Mnr. Jompie Burger, bestuurder van Melk SA se regulasie-en-standaardeprojek en besturende direkteur van die Suiwelstandaard-agentskap (SSA), het by navraag gesê so ’n produk (soos op die foto) voldoen aan die wetlike merkvereistes vir produksamestelling soos vervat in die ou en nuwe regulasies.
Laasgenoemde is op 22 November afgekondig.
“Dit is tans moeilik om die misbruik van suiwelname soos ‘melk’, ‘kaas’ en ‘room’ op nagemaakte suiwelprodukte stop te sit omdat die regulasies dit al soveel jare toelaat.
“In die lig van die toename in nagemaakte suiwelprodukte is daar reeds ooreengekom dat ’n bedryfstaakspan vroeg in 2020 weer aan die hersiening van regulasie R.1510 sal werk, en hom hoofsaaklik op nagemaakte suiwel sal toespits.”
Burger sê die departement van landbou, grondhervorming en landelike ontwikkeling deel die bedryf se sentimente oor sulke produkte.
“Die georganiseerde suiwelbedryf beskou die aangeleentheid in ’n baie ernstige lig. Ons is lid van die Internasionale Suiwelfederasie en die kwessie word tot op internasionale vlak ondersoek ten einde die beste oplossing te vind.”
