Die staat is deels skuldig aan die vlaag plaasmoorde in KwaZulu-Natal, want hoewel hy die nodige hulpbronne het, doen hy nie genoeg om plaasaanvalle aan te pak nie, sê die IVP.
Dit kom nadat nog ’n boer, mnr. Hedley James Brown (70), Maandagoggend op sy plaas Misty View by Lions River, Howick, vermoor gevind is.
“Die staat laat boere in die steek en moet aanspreeklik gehou word. Die staat moet misdaad ontmoedig deur die wet af te dwing en deur seker te maak dat misdadigers swaar vonnisse opgelê word. Anders veg ons ’n verlore stryd en plaasaanvalle sal voortduur,” sê mnr. Nhlanhla Msimango, KwaZulu-Natalse IVP-wetgewerlid en woordvoerder vir landbou en landelike ontwikkeling.
Boere kosbaar
Msimango benadruk dat boere ’n belangrike rol in die samelewing speel, omdat hulle kos voorsien. “Met ander woorde, boere is die ruggraat en die hart van die nasie. As plaasaanvalle en -moorde gelos word om onverpoos voort te gaan, kan dit ’n impak op voedselsekerheid hê, wat meer wysverspreide honger kan meebring.”
Die IVP doen ’n beroep op die staat, veral die polisie, om die veiligheid van mense in landelike gebiede te verseker deur voorkeur te gee aan die beskerming van plaaseienaars en plaaswerkers.
Die party voeg ook sy stem by verskeie organisasies en boere-unies dat plaasaanvalle en -moorde as ’n aparte misdaadkategorie behandel word en dat dit as ’n prioriteitsmisdaad geag word, aangesien hierdie soort misdaad ’n bepaalde oplossing verg.
