Die ekonomie is nie besig om in duie te stort nie, sê dr. Azar Jammine, hoofekonoom van Econometrix. Hy sê dit ploeter eerder sywaarts teen ’n karige groeikoers.
In sy toespraak by Agri SA se kongres in Pretoria, het hy gesê hy verwag ’n 1,5% groeikoers vanjaar en niks meer as 2,5% tot 3% in die volgende klompie jare nie.
Hy het ’n klomp uitdagings in die ekonomie uitgewys, onder meer die swak vlak van onderwys, elektrisiteitspryse, ongunste arbeidswetgewing en swak dienslewering. Hy sê ook die Minister van Finansies, mnr. Nhlanhla Nene, staan voor groot uitdagings, want sy enigste opsies om die tekort op die lopende rekening te bestuur is om die staat te kry om minder te bestee of om ’n reeds oorlaaide belastingkoei nog harder te melk. Al twee van hierdie opsies is volgens Jammine uiters moeilik.
Jammine reken Nene se grootste nagmerrie is as staatsamptenare volgende jaar staak en ’n salarisverhoging van 15% eis.
Hy sê die stakings in die ekonomie vir onredelike loonverhogings het nie tot hoër inflasie gelei nie maar tot groter meganisasie en werkverliese. Hy sê die groei in Sub-Sahari Afrika is bemoedigend, en dit is groter as in Amerika of Japan.
