Jeugskou bied nie net die geleentheid vir kinders om hul potensiaal in die landbou te vind nie, maar ook om plattelandse kinders, veral dié van plaaswerkers, se horison te verruim.
Dit is van die redes waarom die WP Jeugskou uitreik na landelike plaasskole om veral die kinders van plaaswerkers aan te moedig om betrokke te raak, sê mnr. Breyton Milford, voorsitter van die Wes-Kaapse Jeugskou.
Sy span by die WP Jeugskou het onlangs uitgereik na die Primêre Skool Elizabethfontein naby Clanwilliam in die Sederberge om hulle bloot te stel aan die jeugskou, wat dit behels en watter deure dit vir hulle kan oopmaak.
“Ons wil graag meer plaasskole betrokke kry. Ons glo plaaskinders het al op ’n manier met diere in aanraking gekom, hulle ken die landbou-omgewing en ons wil dié kinders ontgin.”
Hy sê baie van die kinders het reeds ’n slag met vee, wat beteken hulle het die vaardighede en aanvoeling om met diere te werk. “Daarom is ons klem redelik sterk op die ontwikkeling van kinders van plaaswerkers en om hulle betrokke te kry.”
Mnr. Johan Jordaan, ’n ouer van ’n jeugskoudeelnemer by Augsburg Landbougimnasium, het die afrigting van die dag behartig het, met Milford, mnr. Joubert van der Merwe, ’n onderwyser van Augsburg Gimnasium, en mnr. Barry Lubbe, ’n jeugskoubestuurslid, wat hom bygestaan het. Plaasdiere soos wolskape en Dorpers is saamgeneem om die kinders touwys te maak. Meer ervare leerders van Augsburg Gimnasium is saam om hand by te sit met die onderrig.
Dr. Jas Strauss van die Travellers Rest-vakansieplaas, wat naby die skool woon, het aangebied dat diere van sy plaas gebruik kan word.
Nagenoeg 80 kinders van die plaasskool het die geleentheid bygewoon. Volgens Milford was hulle almal baie gretig en stel hulle baie belang. “Ons hoop ons kan daar weer ’n vlammetjie aan die gang kry.”
Hy sê dit is belangrik dat daar ’n anker by die skool is, soos Strauss, wat die skool kan help en sal help om die jeugskou onder die leerders aan te dryf.
“Daar moet iemand wees wat elke naweek met die kinders moet werk en daar moet diere wees.
“Ons probeer jaarliks om soveel as moontlik uit te reik na veral plaasskole. Die jeugskou het al voorheen onder meer uitgereik na die Primêre Skool Anne Pienaar naby Malmesbury in die Wes-Kaap. Van die leerders het goed presteer op skoue, maar die covid-19-pandemie het die projek in die jongste tyd gekniehalter.”
Breër horison
Milford sê jeugskou bied die geleentheid dat die plaaskinders se horison verruim kan word. Jeugskoudeelnemers moet na ander plekke reis, terwyl baie van die plaaskinders amper net op die plaas of by die skool is, en af en toe dorp toe gaan.
Nou kan hulle plekke soos Heidelberg, Swellendam, Williston of Bloemfontein besoek.
Milford sê WP Jeugskou sal die skool in die toekoms bystaan met vervoer en ander struikelblokke wanneer kinders aan skoue gaan deelneem.
Leerders van Elizabethfontein is ook baie bekend as vlugvoetige rieldansers en hul rieldansgroep, Betjies van Betjiesfontein, is al as nasionale kampioen in die junior afdeling in die ATKV-rieldanskompetisie bekroon.
