Die plaaslike verkiesing wat gedurende hierdie week plaasvind vra van alle Suid-Afrikaanse burgers om hul stem uit te bring en om raadslede te verkies wat absoluut toegewyd is tot etiese en doeltreffende dienslewering op plaaslike vlak.
Agri SA sê in 'n nuusverklaring Suid-Afrika het nou kundigheid en visionêre leierskap nodig wat met die grootste ywer en opregtheid die belange van alle burgers op plaaslike vlak sal dien.
“Agri SA doen daarom ‘n beroep op alle boere, landboumaatskappye en alle ander rolspelers in die landbou om hul personeel die geleentheid te gun om hul stem by die naaste stembus uit te bring en hul demokratiese reg uit te oefen om vir die politieke party en kandidate wie hulle steun, te stem.
“Plaaslike verkiesings is instrumenteel in ons strewe om die waardes en ideale vervat in ons Nasionale Grondwet vir alle Suid-Afrikaners te help ontsluit. Die geleentheid is juis nou om ‘n stewige fondament vir ‘n beter lewe vir al ons mense te verseker. Gryp dit aan deur aan die plaaslike verkiesing deel te neem en jou stem vreedsaam en respekvol uit te bring. Jou stem tel!”
