’n Basis-handelsplatform vir die verhandeling van graan kan in die derde kwartaal vanjaar deur die Johannesburgse Effektebeurs (JSE) bekend gestel word.
Mnr. Chris Sturgess, senior hoofbestuurder van die JSE se kommoditeitsafdeling, Safex, sê hulle is baie opgewonde oor die ontwikkeling van dié platform.
Hy sê die afskaffing van die differensiaal word nie tans oorweeg nie, en hulle wil daarop fokus om vir die kopers en verkopers op Safex waarde toe te voeg. “Ons moet alle partye meer waarde laat sien, en so ’n platform sal kopers en verkopers meer regstreekse toegang tot die mark gee.”
Sturgess sê verder probeer hulle om die vervoerkontrakteurs betrokke by die bedryf aan te moedig om hul statistiek en koste bekend te maak sodat die bedryf deursigtiger kan wees.
Koring
Intussen is die nuwe verhandelingskontrak vir koring in die Wes-Kaap vanaf 9 Mei 2012 in werking. Dié kontrak gebruik die Paarl as verwysingspunt. Sturgess sê nog geen koring is op dié kontrak verhandel nie, hoewel verkopers hul produkte al daar beskikbaar gestel het.
Sturgess voorspel dat die Paarl vir ’n hele tyd lank goedkoper as Randfontein – die oorspronklike verwysingspunt – sal verhandel.
Hy beskryf die koringbedryf as ’n “tawwe” mark, waarvan die beweging grootliks deur die beskikbare kultivars en gevolglik produksieneigings aangevuur word. Sturgess meen die bedryf sal groot vooruitgang beleef as koringkultivars, wat hoër produksie kan bied, vir die plaaslike bedryf beskikbaar gestel kan word
16 Mei 2012
