Kaap Agri se notering op die JSE skep vir sy aandeelhouers beter likiditeit waarmee hulle die waarde van hul aandele kan ontsluit, sê mnr. Sean Walsh, besturende direkteur.
Die maatskappy het Maandag (26 Junie) by wyse van bekendstelling genoteer. Die doel was nie om kapitaal te genereer nie en daar was dus geen verwatering van aandele nie.
Die aandeel se openingsprys op die beurs was R58,60.
Walsh sê in die verlede was die oor-die-toonbank-beurs baie onlikied, maar aandeelhouers kan nou danksy die notering die maksimum waarde uit aandele put of verder in die maatskappy belê.
Landbou én kleinhandel
Walsh het gesê Kaap Agri, wie se grootste aandeelhouer Zeder Investments is, het sterk landboufondamente maar het die laaste paar jaar toenemend sterk kleinhandeleienskappe opgebou.
Die maatskappy val dus in die JSE-kategorie vir spesialiteitskleinhandel. Mnr. Graeme Sim, finansiële direkteur, sê sommige fondsbestuurders mag net in maatskappye belê wat op die JSE genoteer is, en dié struikelblok is nou uit die weg geruim.
Die notering het geen groot veranderinge in die maatskappy genoodsaak nie, omdat hy reeds die soort korporatiewe beheer en nakoming in plek gehad het wat die JSE vereis, sê Sim.
Walsh is optimisties oor sowel landbou as die kleinhandel. Hy verwag dat die landbousektor groeikoerse hoër as inflasie kan behaal en die spesialis-kleinhandelsektor dubbelsyfergroei.
