Anja Joubert van Riversdal neem aan die “saddle seat”-ruiterkuns-wêreldbeker in Amerika deel en Louw Nel van Nieuwoudtville was in die junior springbokspan wat Wallis op 12 Julie met 47-27 in die eindstryd van die o.20 Ses Nasies-somerreeks geklop het. Nel, die agtsteman, was een van die driedrukkers. die wedstryd wat in Treviso, Italië, gespeel is.
Ruiterkuns
Joubert is lid van die Protea-ruiterkunsspan wat van 25 tot 30 Julie aan die wêreldbekerkompetisie in Harrodsburg in die Amerikaanse deelstaat Kentucky gaan deelneem. Spanne van Suid-Afrika, Amerika, Namibië en Kanada neem deel. Sy en haar ma, Rika, is reeds in Amerika. Haar pa, Johannes, ’n graan-en-skaapboer, en haar suster, Korine, hou die fort op Riversdal.
Rika sê “saddle seat” is ’n vorm van ruiterkuns waarin ruiters in die gewone klas ry van stap, draf en galop na albei rigtings beoordeel word. “Daarna doen elke ruiter en perd ’n toets wat vooraf aan die ruiter gegee word. Dit behels dan allerhande verskillende bewegings wat die ruiter en perd moet uitvoer, waar elke beweging wat die ruiter moet uitvoer ’n punt uit 10 kry.
“Ruiters word beoordeel op styl, horsemanship (dis basies oor hoe goed die ruiter die perd hanteer) en algemene indruk.”
Ruiters kan nie hul perde saamneem nie. Rika sê elke ruiter trek ’n perd uit ’n groep perde wat vir die kompetisie beskikbaar gestel word.
Anja is vroeër vanjaar op die Bloemskou as die driegangkampioen van kampioene op die perd Trujo Exclusive O’Lee (Ollie) aangewys. Sy is ’n BRek-student aan die US en word deur mnr. Adriaan Odendaal by die De Bosch-stal afgerig.
Rugby
Louw se pa, mnr. Tobie Nel, wat met rooibos, lusern, skape en pekanneute by Nieuwoudtville en Hopefield boer, sê Louw speel vir die Stormers en het op skool vir die WP gespeel. Hy is ’n tweedejaarstudent in BComm (landboubestuur) en het reeds in sy eerste jaar vir Maties se eerste span en die WP o.21-span uitgedraf.
