Me. Mase Manopole, LUR vir landbou, omgewingsake, landelike ontwikkeling en grondhervorming het in ’n verklaring haar simpatie met die families van die oorlede plaaswerkers betuig. Teen gister (Vrydag, 20 Januarie) was een werker nog op ’n ventilator in die Kakamas-hospitaal.
Die Noord-Kaap ervaar soos ander dele van die land uiterste warm temperature in die meeste van sy distrikte. Die Suid-Afrikaanse Weerdiens het gewaarsku dat hittegolwe in vier provinsies kan voorkom, insluitend die Noord-Kaap. Die kwik kan die naweek na verwagting in sommige gebiede bo 40 grade Celsius styg.
“Ons weet dat die meeste boere, veral dié in die besproeiingsgebied, gedruk is vir tyd om hul produkte te oes. Dit is egter belangrik om mense toe te laat om tussenin ’n blaaskans te neem om te verfris en hidreer,” sê Manopole.
“Daar word ook van boere verwag om sonskermmiddels en beskermende toerusting soos hoede en liggewigklere aan hul werkers te verskaf.”
Sonsteek is luidens die verklaring ’n siektetoestand wat gepaard gaan met koors en dikwels ’n verlies aan bewyssyn. Dit kom voor wanneer die liggaam se meganisme vir temperatuurregulering ingee indien dit aan uitermate hoë temperature blootgestel word. Tekens en simptome van hitte-uitputting kan naarheid, braking, moegheid, swakheid, kopseer, spierkrampe en -pyne asook lighoofdigheid insluit.
Manopole sê die die provinsie stel ’n span saam uit amptenare van haar departement asook die departemente van arbeid en gesondheid om boere te besoek wat geraak word.
Die humanitêre organisasie Gift of the Givers stuur intussen ’n span na Kakamas nadat die dorp na hom uitgereik het om dringend hulp te vra.
“Die kombinasie van stygende temperature en beurtkrag het tot gekompromitteerde waterlewering gelei, wat hidrasievlakke in die gemeenskap raak,” sê die organisasie. Kakamas het vir gebottelde water en JoJo-tenks gevra. “Hoewel die munisipaliteit ’n waterbron het, is ’n behoefte aan bykomende tenks geïdentifiseer om waterbeskikbaarheid in verskeie gebiede te verhoog.” Die situasie is soortgelyk aan vorige ingrypings wat Gift of the Givers in Kenhardt onderneem het.
