Uitstaande pryse is tydens die Summit-wildveiling op Graaff-Reinet vir Kalahari-springbokke betaal. Die prys van ooie het tussen R30 000 en R58 000 stuk gewissel terwyl ramme teen tussen R120 000 en R360 000 van die hand gesit het. ’n Koffie-springbokram is teen R400 000 verkoop. (Die pryse sluit nie BTW in nie)
Volgens mnr. Hennie Barnard van Skietfontein, Aberdeen, en stigterlid van Summit Wildlife wat uit sewe telers bestaan, het die totale omset van die veiling sowat R15,2 miljoen beloop vir die 97 lotte wat aangebied is. Net vier lotte is nie verkoop nie.
Ander goeie pryse wat betaal is was R415 000 vir ’n Bastergemsbok-koei, R115 000 vir ’n jong koedoebul en R60 000 vir koedoekoeie. ’n Gemsbokbul is teen R200 000 en gemsbokooie teen R65 000 verkoop. ’n Bontebokram het R210 000 behaal en bontebokooie tussen R90 000 en R110 000 stuk.
Nog ’n rekordprys was R65 000 vir ’n bergsebra. Klipspringers is vir R28 000 elk verkoop en Swartwitpenskoeie teen tot R280 000 stuk. Die hoogste prys vir ’n jong buffelbul was R975 000.
Buffels
Twee dragtige buffelverse van die bekende teler, dr. Johann Rupert (hulle is dogters van die buffelbul, Derdemag en dragtig van Grootbaas, een van die grootste buffelbulle in die land met ’n 53”-horingspan) is teen R1,2 miljoen onverkoop verklaar. Die twee verse is egter na afloop van die veiling teen dieselfde prys aan die Glenn Harry-natuurreservaat by Graaff-Reinet verkoop.
Volgens Barnard het sowat 1 000 belangstellendes die veiling bygewoon, wat saam met die Karoo Lus-fees saamgeval het. Altesaam 277 kopers het vir die veiling geregistreer, waarvan 15 oor die telefoon gebie het.
