Kanonkop, een van Suid-Afrika se voorste wynplase, het ’n bekende organiese druiwe-en-wynplaas in Stellenbosch se gesogte Simonsberg-wyk gekoop.
Die Krige-familie van Kanonkop het Laibach, hul buurplaas wat sedert 1994 aan die Laibach-familie behoort het, vir ’n onbekende bedrag gekoop.
“Ons moet die buitelanders wys ons kan ook plase koop,” sê mnr. Johann Krige, wat Kanonkop saam met sy broer Paul besit, skertsend. Daar was die afgelope maande verskeie buitelandse beleggings in die plaaslike wynbedryf.
Buiten sowat 40 ha organiese wingerde is daar ook gasteverblyf en ’n kelder op die plaas.
“Die grootste trekpleister was die grond. Daar is baie waarde in daardie grond en ons kon nie die geleentheid laat verbygaan om ’n buurplaas te koop nie,” sê Krige.
Simonsberg is ’n uitsoekgebied vir wingerdbou en wynproduksie.
“Laibach en Kanonkop het ’n soortgelyke terroir, met verweerde granietgronde en ’n Mediterreense klimaat.”
Die verkoper, dr. Petra Laibach-Kühner, wat nou gaan aftree, sê sy het gehoop die Krige-familie koop die plaas. Sy is baie trots op haar span wat Laibach as “toonaangewende en baanbrekende organiese handelsmerk” kon vestig.
“Ek verlaat hierdie plaas met ’n swaar hart, maar in die wete dat dit nou in goeie hande is.”
Krige sê vir die afsienbare toekoms sal hulle voortgaan met die organiese metodes op Laibach.
“Ons werk wel aan ’n strategie op kort, medium- en lang termyn, maar die organiese praktyke sal beslis aangaan, hoewel dalk in ’n ander formaat.”
Die Laibach-handelsmerk sal ook aanvanklik bly voortbestaan.
“Vir die oomblik gaan alles voort net soos dit is. Daar sal wel mettertyd veranderinge plaasvind, hoewel ek nog niks daaroor kan sê nie,” sê Krige.
“Al wat ek weet, is dat dit ’n wonderlike uitdaging is so op my oudag.”
Al Laibach se werknemers sal op die landgoed aanbly.
