Slegs ses dae nadat Kanonkop sy Black Label Pinotage 2008 bekend gestel het, is hierdie wyn – met ’n prys van R1 100 per bottel – byna uitverkoop.
Mnr. Johann Krige, mede-eienaar van Kanonkop naby Stellenbosch, het aan Landbou.com gesê daar is nog sowat 20 bottels wat eienaar soek, maar dit behoort môre-oggend verkoop te wees.
In die verlede het hy 1 000 bottels van die Black Label bemark, maar vanjaar was sy aanbod effens hoër met 1 200 bottels.
“Dit gaan oor goeie waarde. Die ou wat so ’n bottel koop, weet wat hy gaan kry. Dit is nie ’n skoot in die donker nie.”
Krige sê hy vra nie ’n buitensporige prys nie; hy glo werklik dit is wat die wyn werd is. Die wyn word van ’n wingerd gemaak wat al in 1953 op die plaas geplant is. Behalwe dat hy die “allerbeste Kanonkop-wyn” van die druiwe wou maak, is dit ook deel van Krige se visie om ’n beleggersmark vir Suid-Afrikaanse wyne op die been te bring.
“Dit sal arrogant wees om te raai wat die wyn oor ’n paar jaar werd gaan wees. Die vorige oesjare se waarde het binne twee jaar met sowat 50% vermeerder. Wyn is egter ’n langtermynbelegging. Jy moet dit minstens vyf, ses of sewe jaar wegsit voor jy dit oorweeg om te herverkoop.”
Volgens me. Carol Roux, verkoopsbestuurder by die Wade Bales-wynvereniging (een van die drie afsetpunte vir die wyn), is hul besending binne twee dae uitverkoop.
“Die verkope vir ál drie oesjare was fantasties. Die eerste oesjaar het ons binne twee uur uitverkoop!”
Me. Lorna van der Bank, rekeninge- en kantoorbestuurder by Cybercellar, sê die Black Label 2008 het “baie, baie goed verkoop”.
“ Sommige mense het dit vir ’n belegging gekoop en ander om in hul kelder te bêre.”
Van der Bank meen Suid-Afrika is beslis gereed vir ’n sekondêre wynmark waar ’n koop-en-verkoop-situasie geld.
“Dit is moeilik om te raai wat die waarde van die wyn oor ’n paar jaar gaan wees. Op die oomblik wil niemand verkoop nie, maar ek kan jou verseker dit sal heelwat meer wees as die huidige prys.
Dit is ongelooflik hoe mense begin om wyn as ’n belegging te koop en ek dink Suid-Afrika het ’n hele paar plase wat wyn vir hierdie mark kan produseer.”
Krige se gedagte is dat wynliefhebbers twaalf bottels koop, waarvan hulle ses oor so vyf jaar kan gebruik en die ander ses later kan verkoop. Op dié manier kan ’n wynfundi in ’n siklus kom waar hy jaarliks ’n paar bottels van die nuwe oesjaar koop en ’n paar verkoop.
“Só kan die ding homself betaal.”
18 April 2011
