Mnr. Abrie Beeslaar, keldermeester, het die trofee in Guild Hall in Londen ontvang. Dis die eerste keer dat die toekenning oorhandig word en het saamgeval met die kompetisie se vyftigste verjaardag.
Die IWSK word alom beskou as die wêreld se toonaangewendste wynkompetisie en is al die Oscars van die wynbedryf genoem. Meer as 5 500 inskrywings uit 50 lande word elke jaar beoordeel. Terwyl trofeë aan kelders, stokerye, kleinhandelaars en handelaars van reg oor die wêreld oorhandig is, was Kanonkop die blinkste ster van die aand.
Me. Pip Mortimer, die IWSK se hoof van proeë, sê die toekenning gaan aan ’n produsent wat deurlopend goed presteer het sedert die kompetisie in 1984 ’n Wynmaker van die Jaar-toekenning begin uitloof het. Kanonkop se wynmakers is geen vreemdeling op dié podium nie. Die landgoed het al vier keer die gesogte trofee gehuisves: in 1991, toe mnr. Beyers Truter keldermeester was, en in 2008, 2015 en 2017 het Beeslaar dit ingepalm. Die landgoed het al altesaam 15 individuele trofeë in die IWSK verower.
Kanonkop het vanjaar die Warren Winiarski-trofee vir die beste Cabernet Sauvignon, vir sy Kanonkop Cabernet Sauvignon 2006, huis toe gebring, asook ’n rits silwer en brons toekennings.
Natuur en spanwerk dra by
Mnr. Johann Krige, eienaar van Kanonkop, sê hulle het nog altyd daarna gestreef om wêreldgehalte wyn te maak wat Simonsberg se unieke grond, klimaat en tipografie uitbeeld.
“Ons het dit in ’n baie kort tydjie vermag. Toe die IWSK in 1969 gestig is, het Kanonkop nog nie eens landgoedwyn gebottel nie.”
Die eerste bottel Kanonkop-landgoedwyn is in 1973 gemaak. Krige het die toekenning opgedra aan almal wat dit moontlik gemaak het. Dit sluit in sy oupa Paul Sauer, wat Kanonkop gestig het, sy pa, Jannie Krige, en Jan Boland Coetzee, die wynmaker wat verantwoordelik was vir die eerste Kanonkop-bottelering.
“Hierdie nalatenskap is verewig deur wynmakers Beyers Truter en Abrie Beeslaar, wat verantwoordelik is vir Kanonkop se prestasie-rekord in die wêreld se gesaghebbendste wynkompetisies.”
Krige sê hul sukses in die IWSK is ’n groot spanpoging deur almal wat daar werk, maar het ook benadruk dat die omgewing waar Kanonkop geleë is, ’n groot rol speel.
“Unieke grondtipes, aspek en klimaat gee aan ons uitstaande druiwe om wyne te maak wat nou al ’n unieke identiteit ten opsigte van geurprofiel, verouderingspotensiaal en reputasie ontwikkel het.”
Moet SA help
Hy het die hoop uitgespreek dat die toekenning sal help om die Suid-Afrikaanse wynbedryf se beeld internasionaal te verbeter.
“Ons wynbedryf se geskiedenis strek terug tot 1659 en ons spog met onbetwisbare gehaltewyn, maar Suid-Afrika worstel steeds om ’n beeld van topgehalte in die internasionale handel te vestig. Toekennings soos hierdie wys aan die wêreld dat wat gehalte en identiteit betref, kan Suid-Afrikaanse wyne meeding met – en wen teen – die beste van Frankryk, Spanje, Australië en Amerika.”
