Dit sal boere wat ontwikkelings op hul grond wil doen, die moeite loon om hulle van omgewingswette en –regulasies te vergewis en professionele advies in te win vóór hulle enige ontwikkeling doen, het mnr. Gerhard Pretorius, biodiversiteit-projekbestuurder van die Suid-Afrikaanse Rooibosraad, op ’n rooibos-inligtingsdag gesê.
Die regulasies van die Wet op Nasionale Omgewingsbestuur bevat sekere gelyste bedrywighede waarvoor ’n grondeienaar magtiging van die Departement van Omgewingsake nodig het voor hy/sy met die ontwikkeling begin.
Sekere bedrywighede vereis net ’n basiese bepaling, terwyl ander ’n omvangsbepaling en ’n omgewingsimpakstudie vereis. ’n Basiese bepaling kos sowat R50 000 en ’n omgewingsimpakstudie kan tot R120 000 kos.
Boere kan hulself geld, tyd en moeite bespaar as hulle betyds uitvind watter soort studie of assessering hulle moet laat doen. “ ’n Mens kan nie die proses ontduik nie. Die goedkoopste en beste manier is om van die begin af self so veel moontlik te weet. Die gouste manier om dit te doen, is om dit van die begin af reg te doen.”
Volgens Pretorius kan boere heelwat van die huiswerk self doen en verseker dat hulle goed ingelig is voor hulle ’n konsultant aanstel. Hy kan hulle ook help om ’n aanvanklike bepaling te doen om uit te vind of die ontwikkeling wat hulle beoog ’n gelyste bedrywigheid is.
Pretorius help boere om die rooibosbedryf op ’n volhoubare pad te plaas. Hy het boere wat die inligtingsdag op die plaas Oudam, buite Citrusdal, bygewoon het, aangeraai om ver vooruit planne te beraam. Hy waarsku dat kortpaaie die proses eerder sal vertraag as versnel.
“Moenie probeer om iets uit te laat nie. Dit gaan daaroor om jou aansien te bou. Jy gaan nie naam maak met geraamtes in jou kas nie.”
Boere kan www.capegateway.gov.za/eadp besoek om meer inligting te bekom.
2 Desember 2010
