’n Plaaswerkersgesin van Steynsrus is tot stilstand geruk nadat twee van hul kinders in ’n brand op ’n plaas in die distrik oorlede is.
Die brand wat die lewens van Valencia (3) en Exynia Mohoje (5) geëis het, het Sondag omstreeks 20:45 uitgebreek. Dit het vermoedelik ontstaan weens ’n kers wat in die kamer omgeval het, berig Volksblad.
Mnr. Marius de Vos, eienaar van die plaas, en sy werkers het hul bes geprobeer om die vlamme te blus, maar dit was tevergeefs. Die Senekal-brandweer is ook na die toneel ontbied, maar teen die tyd dat nooddienswerkers by die huis opgedaag het, was die kinders reeds oorlede.
Mnr. Petrus Makgadi en me. Julia Mohoje, die kinders se ouers, was in die kamer langs die kinders s’n tydens die brand. Volgens Makgadi het hulle dadelik hulp ontbied toe hulle die vlamme by die kamer se deur sien uitkom.
Intussen word gepoog om die gesin in die krisistyd te help. ’n Plaaslike raadslid, mnr. Selake Tladi, het ’n verslag van die gesin se behoeftes opgestel en aan die burgemeester van die Moqhaka-munisipaliteit oorhandig.
Bron: Volksblad
8 Mei 2012
