Die burgerregte-organisasie AfriForum glo dat die spreekwoordelike watergehalte-tydbom in Suid-Afrika ontplof het. Dit volg op die onlangse dood van drie kinders op Bloemhof nadat hulle besoedelde water gedrink het.
Volgens Julius Kleynhans, AfriForum se hoof van omgewingsake, is AfriForum bekommerd oor swak bestuur en beleid ten opsigte van water. "Nalatigheid in beplanning, bedryf, bestuur en infrastruktuuronderhoud is die oorsaak van enorme besoedeling van ons waterbronne. Wat op Bloemhof gebeur het, is ongelukkig presies wat ons verwag het," het Kleynhans gesê.
AfriForum glo dat die drie sterftes opBloemhof behoorlik ondersoek moet word en dat die skending van die gemeenskap se grondwetlike regte kwaai gestraf moet word. "Iemand moet aanspreeklikheid vir die lewensverlies aanvaar. Ingevolge die waterwet is waterbesoedeling 'n strafregtelike oortreding waarvolgens individue strafregtelik aangekla kan word. Dít moet egter ook vir die Regering geld,” het Kleynhans bygevoeg.
AfriForum het voorspel dat watergehalte in die land gaan verswak. Die organisasie het in Maart 2014 waarskuwingsbriewe aan verskeie munisipaliteite gestuur waarin hulle gemaan is om die waterkwessies in hulle gebied op te los en met regstappe gedreig is indien hulle sou versuim om op te tree.
“Hoewel ons die R20 miljoen wat nou in Bloemhof se waterinfrastruktuur bestee sal word, verwelkom, is dit nie ’n druppel in die emmer teenoor die verlies wat gesinne ervaar nie. Munisipaliteite moet pro-aktief begin optree om waterbronne en gemeenskappe te beskerm.”
