’n Strafregtelike klag word teen ’n kommersiële boer van die distrik Harrismith ondersoek ná die onlangse verwoestende veldbrande wat die lewe van minstens vier mans in die distrik geëis het.
Die moontlikheid is nie uitgesluit dat die klag, wat met brandstigting verband hou en deur die polisie van Harrismith ondersoek word, tot ernstiger aanklagte soos strafbare manslag, kan lei nie. Die moontlikheid word ondersoek dat die brand van droë materiaal op kontoerwalle die oorsaak van die verwoesting was.
Die vier mans wat ná die Harrismith-brande omgekom het, was mnre. Nico Joubert (wat in ’n brand op die Mount Everest-wildsplaas beseer is), Johan Mocke (’n afgetrede pastoor) en sy 15-jarige seun, Zander, en Kehla Mokoena, ’n werker in die distrik.
Die getal mense wie se dood tot dusver vanjaar met brande in die Vrystaat verbind kan word, kom op agt te staan. Dit is dubbel die slagoffer-gemiddeld wat die afgelope jare in die provinsie se brande aangemeld word. Benewens die Harrismith-slagoffers, het twee brandbestryders vroeg vanjaar op pad na ’n brand verongeluk, ’n bejaarde boer het by ’n Kroonstadse brand aan ’n hartaanval beswyk, terwyl me. Sonja Theron van Frankfort onlangs weens haar brandwonde beswyk het.
