Veranderinge in die klimaat bedreig primêre landbouprodusente, en veral kleinboere, se vermoë om ’n groeiende wêreldbevolking te voed. Die uitbreiding van voedselproduksie mag nie in die gedrang kom nie, sê dr. Theo de Jager, voorsitter van die pan-Afrika-boere-organisasie (Pafo).
De Jager, wat op versoek van die wêreldorganisasie vir boere (WFO), alle boere by die COP22-klimaatberaad in Marrakesh, Marokko, verteenwoordig het, het in sy aanbieding daar gesê voedselsekerheid vorm deel van die Verenigde Nasie se volhoubare ontwikkelingsagenda.
Die klimaatsooreenkoms wat verelde jaar in Parys, Frankryk, bereik is, verleen ook erkenning hieraan. Innovasie en tegnologie-oordrag, belegging in navorsing en voorligting, boerdery-winsgewendheid, ’n omvattende finansieringsraamwerk vir veral boere in ontwikkelende lande en die bemagting van boere deur hulle op die voorgrond van besprekings en aksies te hou, is alles noodsaaklike elemente om die beoogde doelwitte te bereik.
