Die reeks is deur Lizma van Zyl aangebied en op RSG uitgesaai. Dit het uit 104 programme bestaan waarvan die laaste program op 3 April vanjaar uitgesaai is.
Dr. Ivan Meyer, minister van die departement, sê om klimaatsverandering hok te slaan is een van sy prioriteite. “Om bewustheid onder Suid-Afrikaners te bevorder oor die probleme en geleenthede wat klimaatsverandering skep, is ’n belangrike deel van ons veldtog om innoverende oplossings te vind. Die Kwik Styg het die perfekte platform vir die Wes-Kaap geskep om tot klimaatsveerkragtigheid by te dra.”
Dr. Ilse Trautmann, hoof van navorsing en tegnologie-ontwikkeling by die departement, sê die reeks het klankmateriaal gebied wat ’n beeld van verskeie aspekte van klimaatsverandering geskets het.
“Die doel met die reeks was om die verskillende stukkies van die klimaatsverandering-legkaart bymekaar te sit. Die reeks het happiegrootte stukkies inligting voorsien sodat luisteraars klimaatsverandering beter kan verstaan.
“Elke program in die reeks het feite in verband met klimaatsverandering gemeld en dan innoverende en volhoubare oplossings daarvoor gebied. Die programme is afgesluit op ’n optimistiese noot wat mense laat voel dat daar wel hoop vir ’n beter, meer volhoubare toekoms is.”
Die departement het met verlede jaar ook ’n goue toekenning vir sy SmartAgri-plan ontvang.
