Kommer heers in die landbou oor landelike veiligheid met die naderende feestyd, sê Agri SA.
“Dit is mos maar deel van Suid-Afrika dat misdaad gewoonlik toeneem oor die feestyd, en ons is bekommerd daaroor,” sê mnr. André Botha, voorsitter van Agri SA se wet en orde-komitee. Hy sê lede is reeds gewaarsku om hul paraatheid vir dié tyd te verskerp en na hulle eie veiligheid om te sien.
Volgens Botha is daar nie spesifieke areas wat gewoonlik in dié tyd deur misdadigers geteiken word nie, dis landwyd ‘n probleem. Die werklikheid is dat baie mense wat nie gewoonlik in landelike gebiede is nie, oor die Kerstyd huistoe gaan en van hulle maak hulle dan skuldig aan misdade.”
Die Lesotho-grens
Intussen sê mnr. Kobus Breytenbach, voorsitter van Vrystaat Landbou se veiligheidskomitee, misdaad langs die Lesotho-grens neem gewoonlik toe vanaf 15 Desember.
“Dit is gewoonlik ‘n gevoelige tyd vir alle misdaad, soos plaasaanvalle en –insidente. Baie mense gaan dan met vakansie, so inbrake kom voor. Die meeste van ons is ook in ‘n gemoedelike toestand en ons paraatheid is dan nie so skerp soos gewoonlik nie.”
Breytenbach sê die Polisie het egter wel aan hulle aangedui dat hulle van plan is om hulle sigbaarheid in dié tyd op te skerp deur onder andere padblokkades en roetine patrollies.
Geen verlof vir Polisie
Intussen berig die Beeld (16 November) dat geen Polisielede in Gauteng glo toegelaat word om verlof te neem tussen die 15de Desember 2010 en 15 Januarie 2011 nie. ‘n Skrywe is glo verlede week in die verband aan provinsiale hoofde, wyks-, stasie- en eenheidsbevelvoerders gestuur.
Bron: Beeld
16 November 2010
