Daar is baie landboupotensiaal opgesluit in die voormalige tuislande van Suid- Afrika. Die reënvalsyfers in die oostelike deel van Suid-Afrika is redelik hoog en sal na verwagting hoog bly namate die impak van klimaatsverandering ál duideliker word.
Dit is dus belangrik vir die toekoms van dié gebiede – en die land as geheel – dat die landboupotensiaal daar ontsluit word. Een van die redes hoekom dié gebiede nog nie hul volle potensiaal bereik het nie, is die besitregstelsel wat onvoldoende sekuriteit vir kredietverskaffers bied.
Die debat oor ’n alternatiewe besitregstelsel vir kommunale gebiede woed al baie jare lank. Pogings om ’n grondbesitwet te formuleer, het misluk. Die Wet op Kommunale Grondregte (Clara; Wet 11 van 2004) is in 2010 ongrondwetlik verklaar.
