Suid-Afrikaanse skrywers jonger as 28 wat nie beroepsjoernaliste is nie, kon vir die kompetisie inskryf. Hul inskrywings moes oorspronklik wees en kon konsentreer op enige aspek van die landbousektor. Die doel van die kompetisie is om vars, jong mediastemme in die landbousektor aan te moedig.
Masiziba Ruth Hadebe het eerste plek behaal met haar artikel “Ocean farms”, Karen Truter se artikel “Welcome to the boys’ club” het die tweede plek behaal en Michelle Marais se artikel “Small-scale emerging farmers might be the key to restoring more than land equity” het die derde plek behaal.
Hadebe het R5 000 vir haar artikel gewen, Truter R3 000 en Marais R2 000. Elk van die toptien-inskrywings het R1 000 gewen.
Mnr. Andries Wiese, hoof van landbouversekering by Hollard Insurance, sê verskeie elemente is tydens die beoordeling in ag geneem, onder meer of die inskrywing ’n vars blik op die landbousektor verskaf en ’n unieke benadering tot die verkose onderwerp volg, asook die identifikasie van moontlike oplossings vir die probleme wat kommersiële en opkomende boere ervaar.
“Ons is beïndruk deur die gehalte van die inskrywings wat getoon het daar is ’n oorvloed van jong joernalistieke talent wat wag om ontdek en ontwikkel te word.”
Dit is vir Wiese veral belangrik dat die kompetisie aspirant-joernaliste aan die landbou blootgestel het en groter mediadiversiteit in die sektor aanmoedig.
“Die landbousektor is net so omvattend en divers soos Suid-Afrika. Dit moet daarom deur ’n verskeidenheid van stemme beskryf word. Hierdie kompetisie het van die vars stemme gevind en Hollard Insure is trots dat ons deel daarvan kon wees.”
