Vier klein houers gevul met gevriesde bulsemen het tydens spitsverkeer konsternasie op ’n hoofweg in die staat Texas in Amerika veroorsaak.
Die plaaslike brandweer is ontbied nadat ’n Greyhound-bus wat ’n vrag gevriesde bulsemen vervoer het, ’n deel van sy vrag op die hoofweg naby Nashville verloor het.
Toe die brandweer opdaag, het hulle opgemerk dat daar ligte rook uit die vier, klein houers gekom het.
Reuk en rook
Volgens me. Maggie Lawrence, woordvoerder, het die houers ’n onaangename reuk afgegee en het hulle die pad gesluit terwyl hulle probeer vasstel het wat in die houers was.
Die busbestuurder, wat onbewus van die voorval bloot aangery het, het na die toneel teruggekeer toe hy besef het wat gebeur het.
Hy het die noodpersoneel verseker dat die houers nie toksiese middels bevat nie en dat die rook veroorsaak is deur die droë ys wat die semen in die houers beskerm het.
Die pad is daarna weer vir verkeer oopgestel.
Bron: IOL
24 Augustus 2011
