Suid-Afrika ondervind groot uitdagings om die voorgenome vlakke te bereik vir die verlaging van die vrystelling van koolsuurgas or kweekhuisgasse, sê die Minister van Waterwese en Omgewingsake, me. Edna Molewa.
In haar toespraak tydens die 16de internasionale kongres oor klimaatverandering in Cancun, Mexiko, het Molewa dié uitdagings toegeskryf aan Suid-Afrika se historiese afhanklikheid van steenkool vir energie.
Pres. Jacob Zuma het verlede jaar aangekondig dat Suid-Afrika koolsuurgasvrystelling na 34% minder as die gewone vlakke teen 2020 sal verlaag, en tot 42% minder teen 2025. Molewa sê ondanks dié uitdagings besef die Regering dat hy nie ontwikkeling en die uitwissing van armoede kan benader sonder ‘n groen ekonomie nie.
Strategieë en beleid
Volgens Molewa ontwikkel die Regering tans, binne dié konteks, ‘n ‘groen’ ekonomiese strategie. Die Nasionale Klimaatsveranderingsreaksie-beleid is ook tans beskikbaar vir openbare kommentaar, en koolsuurgasbelasting is ook onder bespreking.
Dít sal ‘n prys aan koolsuurgasvrystelling koppel wat ‘n uitwerking op die gewoontes van verbruikers en produsente sal hê.
Klik hier vir die beleid.
Die minister sê die Regering wil tot en met 2012 verskeie alternatiewe energietegnologieë aanwend, soos die opvang van gekonsentreerde sonenergie in die Noord-Kaap en die uitbreiding van aanlegte vir windenergie.
Sy sê dié stappe gaan egter aansienlike finansiering vereis, en hoewel die land dit nie alles kan bekostig nie, sit hulle nie terug en wag nie, maar soek hulle na beleggers. “Ons het egter nodig dat die ontwikkelde wêreld dié pogings ondersteun deur hulle geldelike verantwoordelikhede na te kom.”
Aanpassing is die sleutel
Molewa meen aanpassing moet die kernprioriteit wees van die ooreenkoms wat die betrokke lande in Cancun bereik, hoewel die ooreenkoms ‘n balans tussen aanpassing en voorkoming moet bied.
Sy hoop dat die besluite wat by die kongres geneem word ‘n ferm fondasie vir die beperking van aardverwarming van laer as twee grade Celsius teweeg sal bring.
“Onlangse navorsing toon dat 1,5 grade Celsius egter die veilige limiet is”.
14 Desember 2010
