Suid-Afrika se koringoes kan nóg kleiner wees as verwag na die groot reëns in die sentrale en noordelike dele van die land, meen Graan SA.
Mnr. Andries Theron, ondervoorsitter van dié organisasie, sê hy verwag dat die volgende oesskatting vir koring aansienlik gaan verskil van die vorige een.
“Ons het vroeër verwag dat sowat die helfte van die land se koring ingevoer sal moet word, maar dit kan selfs meer wees,” aldus Theron.
Oos- en Wes-Vrystaat
Hy sê veral boere in die Oos-Vrystaat sukkel om hul oeste van die lande af te kry. “Van hulle kan tot 40% van hul oeste verloor, want hulle was nog nie klaar gestroop voor die groot reëns begin val het nie.” ‘n Inwoner van Clarens het onlangs teenoor Landbou.com opgemerk dat hy in die eerste week van 2011 altesaam 400mm op dié dorp gemeet het.
Mnr. Dirk Viljoen, voorsitter van Bethlehem se boerevereniging, sê baie boere in dié distrik kon nog glad nie stroop nie. “Ek kon nog nie in my lande in nie, en een van die boere het moedeloos gebel, hy kon net 30 ha stroop toe sit hy vas. Gelukkig skyn die son vandag, ons hoop dit hou!”
Volgens Theron was oeste in die Hoopstad-omgewing nie orals na wense nie en boere in die sentrale Vrystaat het aangedui dat hul oeste nie so goed soos verwag was nie. “Ons verwag in die volgende seisoen ‘n verdere afname in aanplantings in die Oos- en Wes-Vrystaat. Die risiko’s vir dié ouens raak net te groot.”
Die oeste in die Noord-Kaap was wel na wense, veral in besproeiingstreke, sê Theron.
Mielie-aanplantings
Intussen sê dr. Kobus Laubscher, hoof uitvoerende beampte van Graan SA, hulle kry ook klagtes van boere oor skade aan jonger mielies weens die reën.
“Baie van die boere sukkel ook tans om hulle topbemesting in die lande in te kry. Die boodskap is egter dat die reën oral verwelkom word, hoewel dit ontwikkeling plek-plek kan benadeel. Die situasie is egter nog heeltemal bestuurbaar,” aldus Laubscher.
10 Januarie 2011
