Die koringtarief is te laag en die Departement van Handel en Nywerheid het net ’n jaar tyd om dit reg te stel as hy Suid-Afrika se koringbedryf wil beskerm, sê prof. Mohammad Karaan, dekaan van die fakulteit van landbouwetenskappe by die Universiteit van Stellenbosch.
Karaan, wat ook ’n kommissaris van die Nasionale Beplanningskommissie is, het gesê minister Rob Davies en sy departement het die pos mis gesit met die vorige vasstelling van die koringtarief. Die tarief is te laag om die bedryf te beskerm. Hy het by Agri SA se kongres op Muldersdrift gesê daar kan nie weer drie jaar gedraal word om die tarief aan te pas nie. Om die bedryf te red moet dit binne ’n jaar gedoen word.
Karaan sê koring is een van die kommoditeite wat ’n bloeitydperk gaan beleef omdat mense wegbeweeg van mielies af na rys, pasta en brood as stapelvoedsel. Ander kommoditeite wat ’n oplewing gaan beleef is sojabone, oliesade, veevoerbestanddele en lewendehawe.
Hy sê die landbousektor staar twee groot kwessies in die gesig. In die eerste plek gaan daar weer ’n voedselkrisis wees en dit gaan groter wees as die vorig een. Terselftertyd word nou vir die eerste keer in 10 000 jaar meer geld in die landbou ingepomp as wat daaruit gehaal word. ’n Nuwe benadering tot die landbou is nou nodig.
11 Oktober 2010
