Bykans 600 beeste van kommersiële kommunale boere is oor die afgelope vyf jaar weens Korridorsiekte dood in die Magudu-omgewing naby Pongola in KwaZulu-Natal.
“Ek boer al geslagte lank in hierdie distrik en nog nooit was daar ’n probleem met Korridorsiekte nie,” verduidelik mnr. Johannes Steenkamp, ’n beesboer van die omgewing.
Mnr. Mark Dedekind, die mede-eienaar van Mahlalela private wildreservaat en Steenkamp se buurman, moet hy nou sy buffels verskuif weens die Korridorsiekte-uitbreking. “Ons het ongeveer ses jaar gelede die eerste siektevrye buffels op die plaas vrygelaat en nooit ’n probleem ondervind nie. Ongeveer ses maande gelede het twee van ons buffels, wat onlangs as siektevrye buffels aangekoop is, gesterf. Ekstensiewe na-doodse ondersoeke het uiteindelik bevestig dat die oorsaak wel Korridorsiekte is. Ons plaas val net buite die area waar buffels besmet met Korridorsiekte toegelaat word en dus sal ons nou hierdie buffels moet skuif. Dit gaan die besigheid ’n koste van ongeveer ’n miljoen rand op die lyf jaag te danke aan die verskil in waarde van ’n skoon en besmette buffel,” verduidelik Dedekind.
In 2005 het die staatsveearts geglo dat die vektor van Korridor siekte, die bruin oor-bosluis, nie ’n aktiewe bosluis is nie en hoogstens ’n meter per jaar beweeg. Op gronde van hierdie aanname, wat aan die beesboere van Pongola verkondig is en wat oor die afgelope dekade deeglik verkeerd bewys is, het beesboere ingestem om buffels in die gebied toe te laat.
“Noudat die probleem ons op ons knieë forseer, nou is die staat nêrens te vinde nie. Opkomende boere lei die meeste skade. Daar is heelwat gevalle in die omgewing waar gesinne hulle ganse kudde - hul bron van inkomste - verloor het. Dit is tragies,” verduidelik Steenkamp.
Mnr. Kobus Badenhorst, ’n boer en verteenwoordiger van die Rooivleisprodusente-organisasie in die omgewing, meen ’n skeidsregter is nodig. “Iemand wat die nodige aandag aan hierdie probleem kan skenk. Dit is ’n saak van nasionale belang en nie net beperk tot die Noorde van KZN nie. Tot dus vêr het die staat sy plig om die behoud van die nasionale buffel- en beeskudde te beskerm, tragies versuim,” verduidelik Badenhorst.
Die beesboere van die distrik gaan nou hul saak aan die Openbare Beskermer rig en hoop dat hulle daar hulp sal kry. Na vele pogings kon Landbouweekblad nie daarin slaag om kommentaar in dié verband van die staatsveearts te bekom nie.
