Volgens Beeld was Jamestown in die Oos-Kaap vandag die koudste waar 'n minimum temperatuur van -12 ºC vanoggend om 05:00 aangeteken is. In Gauteng was dit -2 ºC in Irene en by die Johannesburgse Botaniese Tuine, terwyl dit -6 ºC in Springs en -9 ºC in Vereeniging was.
Op Frankfort in die Oos-Vrystaat was dit ook -9 ºC en op Bethlehem was dit -8 ºC. Op Sutherland in die Noord-Kaap was dit -9 ºC. Underberg in KwaZulu-Natal het -11 ºC geregistreer en op Aliwal-Noord in die Oos-Kaap was dit -9 ºC. Op Carolina in Mpumalanga en op Bela-Bela in Limpopo was dit -3 ºC. Op Potchefstroom in Noordwes asook in Kimberley, Bloemfontein en op Postmasburg was dit -7 ºC gewees.
Lesers het ook op Facebook en Twitter gegons oor temperature wat ver onder die vriespunt gedaal het: Op Dordrecht in die Oos-Kaap het die kwik vanoggend glo by Klipkraal op -17 grade gaan draai, by Molteno kon 'n mens met jou rug op 'n plaasdam gaan lê, op Potchefstroom het waterkrippe verys en op ’n plaas by Nieu-Bethesda was die minimum volgens 'n leser -13. 'n Leser van Bethlehem het ook 'n foto na Landbouweekblad se Facebookblad gestuur van sy swembadwater wat verys het.
Volgens die Suid-Afrikaanse Weerdiens is nuwe lae rekordtemperature gisternag op die volgende plekke aangeteken: Fickburg (-10,8 ºC), Porterville (-7 ºC), Pennington-Suid (6.8 ºC), Buffelsfontein naby Molteno (-16,4 ºC, dit word dikwels as die koudste plek in Suid-Afrika beskou), Vereeniging (-9.0 ºC), Potchefstroom (-9.2 ºC), Lichtenburg (-6.8 ºC), Kaap St. Francis (12 ºC teenoor 'n vorige jaar se 12,9 ºC) en Addo-olifantpark (-2.5 ºC).
Dit lyk asof dit net die Natallers en Mpumlanga-inwoners is wat dié tyd van die jaar van die koue greep ontsnap met maksimum temperature wat daar in die middel twintigs kuier.
Bron: Beeld, http://www.news24.com/
