Kragopwekkers is die enigste onmiddellike oplossing vir boere wat besproeiingspompe, koelkamers, paklyne of melkstalle staande moet hou te midde van ontydige beurtkrag wat deesdae dikwels meer as vier uur op ’n slag aanhou, sê die energiekonsultant mnr. Henning Holm van Holms & Friends.
Daar is egter ’n tekort aan groot kragopwekkers wat vir sulke kommersiële doeleindes aangewend kan word, sê mnr. Harold Burgess, besturende direkteur van Dabar Energie.
Volgens hom word feitlik al die kragopwekkers ingevoer, met enkele maatskappye wat komponente invoer of vervaardig en opwekkers dan plaaslik en doelgemaak aanmekaarsit.
