Met beurtkrag wat deesdae deel van almal se daaglikse skedule is en die hoë insetkoste in die landboubedryf meen Agri Wes-Kaap dat Eskom se aansoek om ’n tariefverhoging van 32% vir die 2023-’24-boekjaar “verregaande” is.
In ’n verklaring spreek dié organisasie sy kommer uit oor die uitwerking wat so ’n tariefverhoging op die landbousektor kan hê. “Landbouprodusente moes oor die afgelope jaar menige styging van meer as inflasie in insetkoste absorbeer,” sê mnr. Jannie Strydom, uitvoerende hoof van Agri Wes-Kaap. “Enige styging van meer as inflasie in kragtariewe sal aansienlik bydra tot die huidige kosteknyptang-situasie en produsente se vermoë om volhoubaar te produseer verder belemmer.”
Strydom sê ’n styging van dié aard sal veroorsaak dat dit vir die landbousektor onvolhoubaar word om werksgeleenthede te skep. Dit sal voedsel ook onbekostigbaar maak.
Die nasionale energiereguleerder (Nersa) was veronderstel om op 29 November sy besluit aangaande Eskom se aansoek aan te kondig. Die aankondiging is egter uitgestel tot Desember.
Mnr. Charles Hlebela, hoof van Nersa se departement vir kommunikasie en belanghebbendes, sê die aansoek is van die agenda gehaal om “sekere inligting te verifieer”. Die aansoek sal weer ingedien word nadat dié verifiëring plaasgevind het. Dit sal voor einde Desember geskied, maar die presiese datum moet nog bepaal word.
Agri Wes-Kaap sê hy “verneem van die bespiegelinge in die media dat die ware rede vir die aankondiging van so ’n skerp styging uitgestel is om die ANC teen openbare verontwaardiging te beskerm, aangesien die ANC se nasionale verkiesingskonferensie van 16 tot 20 Desember plaasvind”.
“Agri Wes-Kaap wil egter glo dat Nersa steeds as ’n onafhanklike statutêre liggaam funksioneer, soos vereis in die Wet op die Nasionale Energiereguleerder van 2004,” lui die verklaring. “Ons doen daarom ’n dringende beroep op die reguleerder om sy besluit so spoedig moontlik aan te kondig om alle bespiegelinge in die kiem te smoor. Agri Wes-Kaap volstaan by sy kommentaar tydens die proses van openbare deelname, beide skriftelik én tydens die openbare verhoor, dat die landbou nie ’n tariefverhoging van meer as inflasie kan bekostig nie.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
