Pannar het vanjaar op die Extravaganza sy PowerCoreTM-tegnologie bekend gestel.
“Dit is iets wat nog vir jare deel van ons produkaanbieding sal wees,” het mnr. Nick Globe, Pannar se sakebestuurder, gesê.
“PowerCore is ’n opwindende nuwe eienskap en tegnologie wat in ons produkte gebruik word. Dit gaan baie voordele vir boere inhou, veral in terme van die volhoubaarheid van die insekbekamping wat dit bevat,” het mnr. John Odendaal, Pannar se nasionale bemarkingsbestuurder, gesê.
Val Extravaganza
Pannar het sy reeks Extravaganza-dae afgeskop met die eerste geleentheid wat by Val, by Standerdon in Mpumalanga, gehou is.
“Dit is die eerste keer dat ons dit hier aanbied. Voorheen was dit by Delmas. Ons is in ’n vennootskap met lede van die Val-boerevereniging. Hulle bestuur die perseel saam met ons. Weens die verandering van die terrein het ons net die uitleg van die perseel en hoe ons die dag aanbied bietjie verander om dit meer gebruikersvriendelik te maak en meer waarde vir boere te bied,” het Odendaal gesê.
@landbouweekblad #Landbouweekblad was by @Pannar Seed se Val #Extravaganza net buite Standerton, Mpumalanga. #landbou #agriculture #pannar #boeredag #farmersday #fyp ? Farmers' Market - Laurent, Mathieu
Die sukses van die Extravaganza
Die sukses van Pannar se Extravaganza-dae lê in die waardetoevoeging vir die boere.
“Ons het navorsing gedoen oor wat waarde toevoeg vir boere in Amerika en het met die innoverende konsep terug Suid-Afrika toe gekom. Dis ’n dag waartydens ons sosiaal met al ons kliënte kan omgaan. Dit gee ook vir ons die geleentheid om vroegtydig onsself aan die boer te verbind wat dan hopelik die boer sal oortuig om hom vroegtydig aan die handelsmerk te verbind,” het Globe gesê.
“Die Extravaganzas moet informeel en lekker wees, maar terselfdertyd waarde toevoeg vir die boer. Deur die aanbiedinge kan hulle leer hoe om hul opbrengste te verhoog en sekere probleme te benader en uit te skakel. Ons gebruik ook die geleentheid om vir ons boere meer te vertel van Pannar se nuwe produkte,” het Odendaal gesê.
“Ons het vanjaar die Extravanaganza vir die eerste keer by Val aangebied vir 400-500 boere. Ons bied ook twee ander Extravaganza-dae aan – een op Biesiesvlei in Noordwes en een op Kroonstad in die Vrystaat. Daarby gaan ons ook ’n reeks kleiner boeredae in ander dele van Suid-Afrika aanbied. Ons verwag dat sowat 2 000 boere die dae oor Suid-Afrika heen gaan bywoon.”
