“Die duidelike boodskap wat ons wil uitstuur oor die moontlikheid van die ontginning van gas in KwaZulu-Natal is eenvoudig: Néé!” Só sê me. Sandy la Marque, uitvoerende hoof van Kwanalu, na afloop van die openbare vergaderings wat deur SLR-Consulting en Rhino Oil and Gas in die provinsie gehou is.
SLR is ’n agentskap wat omgewingsimpakstudies, asook die aanvanklike eksplorasie-toetse namens Rhino Oil and Gas in KZN doen. Tydens die openbare vergaderings word die publiek die geleentheid gegun om kommentaar te lewer, wat uiteindelik aan die Petroleumagentskap van Suid-Afrika (Pasa) en die Ministrie van Energie voorgelê moet word.
Volgens La Marque was Kwanalu sterk verteenwoordig by hierdie vergaderings en het álle boere by hierdie vergaderings dit duidelik gemaak dat hulle sterk gekant is teen die planne om op bykans 10 000 plase in KZN vir gas te eksploreer.
“Talle bekommernisse is in hierdie vergaderings geopper en ’n menigte vrae is steeds onbeantwoord. Oor die algemeen was die gevoel dat bekommernisse nie aangehoor word nie. Die Regering en PASA blyk nie asof hulle belangstel nie, aangesien hulle nie by een van die vergaderings was nie.”
Kommer heers ook oor die geloofwaardigheid van die verslag wat SLR moet saamstel. “Indien ’n maatskappy jou betaal om ’n verslag saam te stel, dan sal jy meer dikwels as nie, insette saamstel wat die maatskappy se belange dien. Geag na die swak georganiseerde konsultasieproses wat meestal in ver afgeleë plekke in té klein lokale gehou is, geen luidsprekerstelsels en die aankondiging van die vergaderings wat slegs in die Engelse media versprei is, kan dit vertolk word dat die maatskappy (Rhino Oil and Gas) en die agente (SLR) nie belangstel in ’n ware konsultasieproses nie,” sê La Marque.
SLR moet die verslag uit die vergaderings voor einde November 2015 aan Pasa en die Regering voorlê.
