Mnr. Marthinus Stander, voorsitter van die Suid-Afrikaanse Pluimveevereniging (SAPV) se braaihoenderorganisasie, sê syfers van die Suid-Afrikaanse Inkomstediens (SAID) toon dat die kwota vir die 12 maande vanaf April 2017 tot Maart 2018 met 4 649 ton oorskry is.
’n Kwota van 65 000 ton wat per tydperk van 12 maande (April tot Maart elke jaar) vry van die teenstortingstarief van R9,40/kg die land mag binnekom, is in 2015 tussen Suid-Afrika en Amerika beding.
Amerika het destyds gedreig om Suid-Afrika uit sy wet op groei en geleenthede in Afrika (Agoa) te skop as Suid-Afrika nie toegewings rakende die tarief maak nie.
Elke kwartaal
Die kwota is in vier kwartale opgedeel: In elke kwartaal mag 16 250 ton die land sonder teenstortingstariewe binnekom.
Só moet voorkom word dat die hele kwota in ’n kort tydperk die land binnekom en die mark ontwrig.
Stander sê die SAID-syfers vir 2017-’18 toon dat die kwota in die eerste kwartaal met 218 ton oorskry is, in die derde met 2 042 ton, en in die vierde met 2 388 ton.
In die tweede kwartaal is slegs 9 491 ton van die kwota gebruik, sodat 6 759 ton na die vierde kwartaal oorgedra is.
In die vierde kwartaal het 25 397 ton die land egter klaarblyklik as deel van die kwota binnekom.
Stander sê as die jaarlikse kwota wel met 4 649 ton oorskry is en die teenstortingstarief nie daarop betaal is nie, het Suid-Afrika daardeur sowat R43,7 miljoen verloor.
Die SAPV het die Departement van Landbou, Bosbou en Visserye, asook die kommissie vir internasionale handelsadministrasie (Itac) nou skriftelik gevra of permitte vir meer as die toegelate kwota uitgereik is, en of die teenstortingstarief betaal is op alle Amerikaanse hoenderstukke aan die been wat sonder die kwota ingevoer is.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
