Hoe is dit moontlik dat boere en plaaswerkers op 'n klein skaal elke mieliepit met behulp van tegnologie met presisie kan plant, maar Eskom kan nie op 'n groot skaal bestuur van hul werksaamhede en tegnologie toepas nie? Dit was een van die vrae wat mnr. Nicol Jansen, voorsitter van Agri Noord-Kaap, vandag tydens 'n saamtrek van landbougemeenskappe by GWK se perseel op Douglas in die Noord-Kaap gevra het.
In dié video bo gesels mnr Gerhard Bruwer, 'n plaaslike boer, met Charné Kemp.
Motoriste op paaie in die distrik Douglas het vandag sogenaamde stadsverkeer ervaar en op plekke slegs 5km/h op die nasionale paaie kon ry soos wat honderde boere en plaaswerkers met trekkers en ander plaasvoertuie na Douglas op pad was vir 'n vergadering waar hulle onder meer met die media gepraat het oor die verwoestende impak wat beurtkrag en die land se kragkrisis op hul boerderye het.
Meer as 300 000 ha se somergraangewasse word onder besproeiing in die land verbou, asook sowat 80% van die land se aartappels. Die krisis wat beurtkrag meebring raak elke sektor in die landbou.
Graan SA het vroeër die week aan Landbou.com gesê dat sommige boere die komende week baie moeilike besluite oor dié jaar se somergraan-aanplantings asook oor hul boerderye gaan moet neem.
Lees hier meer oor vandag se saamtrek.
