WAARSKUWING: Die beeldmateriaal in dié berig kan sommige lesers ontstel.
Die hoenderhuis het afgeskakel nadat ’n langdurige fout deur Eskom lae spanning veroorsaak het.
“Ons sukkel al met Eskom sedert 14 Desember nadat ’n transformator op die Coligny-Putfontein- (C-P) lyn onklaar geraak het. Eskom het ons daarna verseker dat ’n kontrakteur die transformator sal vervang en ons is op ’n alternatiewe lyn geplaas, terwyl die werk afgehandel sou word. Dit het egter nie gebeur nie, en op die alternatiewe lyn het ons deurentyd kragonderbrekings ervaar, waarna ons op nog ’n lyn, die Makokskraal-Opraaplyn, geplaas is. Dit het vir ’n wyle beter gegaan, maar die spanning in hierdie lyne is heeltemal te laag. Waar ons normaalweg met ’n 380 V-lyn werk, is daar slegs 186 V op die lyn, wat beteken het dat ons spilpunte slegs beurtelings kon besproei en ons werksaamhede aansienlik ingekort is.”
Du Preez sê nadat Agri Noordwes met Eskom in gesprek getree het, het die instelling beloof dat die oorspronklike C-P-lyn herstel sou word. Dit het egter nie gebeur nie, en met die 186 V-spanning het die hoenderhuis homself afgeskakel. “Boonop het die kragopwekkers nie ingeskop nie, want daar was krag op die lyn.” Die gevolg was dat amper 40 000 kuikens met ’n totale waarde van sowat R1,6 miljoen gevrek het.
Die Eskom-situasie benadeel nie net Du Preez se hoenderboerdery nie. As produsent wat ook met mielies boer, sê Du Preez dat die voortslepende beurtkragsituasie beteken dat hy ook nie kan besproei nie. “My buurman mnr. Attie du Plessis sê sy spilpunte staan reeds meer as ’n week en hy het daardie oes eintlik al afgeskryf. Gegewe die insetkoste wat aangegaan word om mielies onder besproeiing te produseer, is dit ’n groot finansiële slag vir enige boerdery.”
Du Preez, wat die hele waardeketting in hoenderproduksie bedryf, sê die beurtkragsituasie benadeel hom ook daar. “Ons slag sowat 140 000 hoenders per dag, en met beurtkrag wat nou al vlak 6 bereik het, kan ons nie voldoende verkoeling bied nie. Die slag van hoenders word dus uitgestel, wat beteken dat die hoenders meer word en later nie meer gevoer kan word nie, omdat ons meule staan.” Trouens, sê Du Preez, ’n voermeule wat verlede jaar opgerig is en wat sowat 12 000 ton voer per maand kan produseer, kan nie in werking gestel word nie, omdat daar nie voldoende elektrisiteitsvoorsiening is nie.
“Dit maak ’n mens raadop. Ons probeer ’n eerlike bestaan voer met ’n normale lewenswyse vir ons en ons kinders, terwyl ons werk skep, maar dan kom ’n staatsinstelling en voeg nog teëspoed by ons bestaande probleme.”
Du Preez sê hy gaan regsadvies inwin.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
