In ’n videogreep wat deur ’n markagent aan Landbouweekblad gestuur is, kan duidelik gesien word hoe vars produkte in die mark se koelkamers verrot, terwyl temperature die hoogte inskiet. “Ek kan omtrent nie hier asemhaal nie, die plek is so warm en bedompig,” sê die agent terwyl hy ’n video neem van pruime, appels en perskes.
“Tonne steenvrugte, sagtevrugte en piesangs is besig om vrot te word, terwyl die Tshwane-munisipaliteit versuim om die elektrisiteitstoevoer te herstel of aan die varsproduktemark kragopwekkers te verskaf,” sê me. Theresa Fredericks, bestuurslid van die Instituut vir Markagente in Suid-Afrika (Imasa).
Sy sê die situasie het verlede week ontstaan nadat ’n substasie op Donderdag 19 Januarie naby die varsproduktemark gevandaliseer is. “Dit het gebeur te midde van die mandamus-proses wat deur Agri SA en Imasa teen die Tshwane-munisipaliteit ingestel is om dienste te verskaf.” ’n Hofbevel het die munisipaliteit in November verlede jaar beveel om R18 miljoen beskikbaar te stel ten einde die Tshwane-varsproduktemark na behore op te gradeer. Dit het nog nie gebeur nie.
