Mnr. Gabriël Viljoen van GP Viljoen Farms sê die skade beloop R60 miljoen. “Een skaal kos R50 000 en ons het 56 skale gehad.” Sowat R1,5 miljoen se tafeldruiwe moes weens brandskade vernietig word.
“Benewens ’n verlies aan inkomste kan ek ook markte verloor, omdat ek nie my ondernemings aan buitelandse kopers kan nakom nie. Die brand kan ons dus ook internasionaal skade berokken, omdat ons nie ons leweringsprogram vir ’n supermark kon nakom nie.”
Vir die 430 seisoenwerkers wat nou hul werk kwyt is, beteken dit minder geld kort voor Kersfees en met die begin van die nuwe jaar, wat vir sommige uitgawes soos skoolgeld meebring.
