Cruise het onlangs verskeie dele van Suid-Afrika besoek om tonele vir die agtste aflewering van die reeks Mission Impossible-aksieflieks, waarin hy die rol van ’n geheime agent vertolk, te verfilm.
Mnr. Angus Braithwaite van die familieboerdery Damview Brahmans in die distrik Bergville sê hy het gehoor ’n buurman het die graslandingstrook op sy plaas aan die Mission Impossible-rolprentspan verhuur het. Oor ’n tydperk van ongeveer ’n maand in Maart en April het die rolprentspan ’n groot tydelike vliegveld en ander infrastruktuur by hierdie landingstrook opgerig.
“Ek was geïnteresseerd om te sien wat daar aangaan. Ek het soontoe gery en net buite die landingstrook se heining gaan staan. Ek was regtig verbaas toe die rolprentspan se sekuriteitsmense my daar sien en nooi om oor te kom,” sê Braithwaite. Hy sê hy het sowat tien helikopters en vyf vliegtuie van verskillende tipes getel.
Hy voeg by dat hy selfs meer verbaas was toe hy Cruise daar gewaar. Die akteur het homself aan Braithwaite voorgestel, ’n kort geselsie aangeknoop en was ook bereid om ’n foto saam te laat neem.
Braithwaite sê Cruise was daar om dieselfde dag vliegtonele en lugtoertjies oor die nabygeleë Drakensberge te skiet. “Ek en hy het bietjie oor Suid-Afrika gepraat en hy het ook vir my vertel hoe mooi ons area hier is en hoe hy die vriendelikheid van die plaaslike inwoners waardeer.”
Die Tom Cruise News (@TCNews62) het op Twitter het ’n video-twiet geplaas van die akteur wat met ’n huurvliegtuig op die Ladysmith-lughawe in KwaZulu-Natal aankom, en ook van sommige van die dubbelvlerkvliegtuie wat Braithwaite op sy buurman se plaas gesien het.
Die eienaar van die plaaslandingstrook wat Cruise en die Mission Impossible 8-filmspan gebruik het, wou nie sy naam genoem hê nie en het aan Landbouweekblad verduidelik dat hy kontraktueel verbied is om kommentaar te lewer oor die verfilmingsaktiwiteite op sy eiendom.
