Met meer as 100 mm reën wat sedert verlede week oor die provinsie uitgesak het, is vooruitsigte vir die bedryf nie goed nie.
Mnr. Angus Williamson, voorsitter van die KwaZulu-Natalse Rooivleisprodusente-organisasie, sê die reën gaan ’n groot uitwerking op vleisbeeste hê, maar veral melkboere se bedrywighede raak. “Ons is nou in daardie stadium van die jaar wanneer melkboere hul kuilvoer sny en dekgewasse vir winterweiding plant. Uiteraard beteken so ’n groot hoeveelheid reën dat hierdie boere nie in hul lande kan kom nie, wat vertragings meebring. Dit gaan chaos veroorsaaak vir boere wat kuilvoer moet sny en winterweidings plant.”
Williamson sê na gelang van wat in die komende weke gaan gebeur, kan die nat toestande boere se werksaamhede met tot ’n maand vertraag. “Daar word nog reën voorspel en ons het reeds ’n nat seisoen gehad. Een van die melkboere met wie ek gepraat het, het gesê dat hy reeds twee keer stukke van sy grond vir winterweiding beplant het. Die eerste keer het die nat toestande daartoe gelei dat die sade nie ontkiem het nie, en nou het hy weer baie reën gehad. Met kunsmis- en saadpryse wat so hoog is, het dit ’n groot nadelige impak op daardie boer se finansies.”
Ook natuurlike weidings, wat normaalweg onder goeie reën gedy, loop deur. “Jy moet onthou, daar loop nou fonteine waar daar nie voorheen fonteine was nie. Dit maak weidings moeilik begaanbaar, modderig en dit lewer nie die gehalte wat dit moet nie. Terselfdertyd is die hooi wat hieruit gesny word, ook nie van die standaard wat dit moet wees nie.”
Benewens die uitbrekings van bek-en-klouseer besorg insekgedraagde siektes, veral drie-dae-stywesiekte, boere probleme. “Ek het met ’n boer van Underberg gepraat wat meer as honderd koeie weens drie-dae-stywesiekte verloor het, selfs nadat hulle ingeënt is. Dit is ’n besonder moeilike jaar met ons diere wat al amper soos speldekussings lyk weens die hoeveelheid inentings wat ons teen insekgedraagde siektes moes toedien.”
Probleme met infrastruktuur veroorsaak verdere probleme vir boere, sê Williamson.
“Tradisioneel is die speenkalfprys hierdie tyd van die jaar laer, maar met al die ander kwessies wat ook opgeduik het, staan ons boere werklik voor ’n groot probleem. Ons hoop dat toestande sal verbeter, want tans gaan dit baie moeilik.”
