Nadat swaar reën en vloede bedrywighede by die Durbanhawe tot stilstand gedwing het, is dit vanaf 06:00 gedeeltelik hervat. Risikobepaling word voortgesit om die veiligheid van die hawe se personeel en infrastruktuur te verseker.
Mnr. Pravin Gordhan, minister van openbare ondernemings, sê luidens ’n verklaring oor Transnet se werksaamhede die herstel van Bayhead-pad, die hooftoegangsroete na die vraghouerterminaal, is een van die grootste prioriteite. ’n Gedeelte van dié pad het verspoel. Nog ’n prioriteit is om vragte voedsel, mediese voorrade en petroleumprodukte uit die hawe te verwyder.
Verskeping sal hervat sodra bepaal is dat veilig is om daarmee voort te gaan.
Die Transnet-hawe-owerheid moes gister helikopters inspan om 80 mense te red wat weens vloede op verskeie plekke in Durban vasgevang was.
* Die video is deur Kwanalu aan Landbou.com verskaf.
Luidens die verklaring was daar geen skade aan Transnet se pyplyne nie en sal daar dus voortgegaan word met die verskaffing van brandstof aan die binnelandse mark.
Eskom staan tans die eThekwini-munisipaliteit met herstelwerk aan infrastruktuur by en kragvoorsiening aan die hawe se Island View-gebied is gisteraand herstel. Eskom het aangedui dat beurtkrag vir dié munisipaliteit opgeskort sal word.
Die nodige inspeksies word gedoen om te bepaal of dit vir Transnet se kliënte veilig is om hul bedrywighede te hervat aangesien sommige kliënte se geriewe by die hawe deur die vloede beskadig is.
Transnet Freight Rail is besig om te bepaal tot watter mate die spoorwegnetwerk in en om Durban beskadig is voor spoorwegdienste in en om die hawe hervat kan word. Die Noordkus-, Suidkus- en hooflyn vanaf Durban tot by Pietermaritzburg bly gesluit.
Bedrywighede in Richardsbaai het hervat, maar die terminale funksioneer minder doeltreffend weens probleme met nat vragte.
Padvragte versoek om te wag
Intussen het owerhede in KwaZulu-Natal versoek dat alle padvragte, waar moontlik, wat vir die Durbanhawe bestem is, vir eers opgeskort of teruggehou moet word tot toestande by die hawe verbeter het.
Mnr. Gavin Kelly, uitvoerende hoof van die padvragvereniging, sê luidens ’n verklaring dat daar reeds lang rye vragmotors op die N3 is. By die Marianhill-plaza het ’n opeenhoping van 10 km al die pad tot by Hammarsdale gevorm. Dit het tot plundering gelei.
“Toegangspaaie om die hawe is beskadig en werwe vir vraghouers, vragmotordepots en vragmotors is verspoel en beskadig – dit is eintlik tans ’n rampgebied.”
Hy waarsku dat daar beslis ’n impak op logistiek sal wees en waarskynlik onderbrekings in die aflewering van ingevoerde goedere.
“Die vereniging het sy lede aangeraai om reise na Durban uit te stel en om depots en veilige plekke vir parkering langs die pad te vind. Waar moontlik word lede ook versoek om mekaar by te staan om voertuie van die pad te verwyder en op veilige plekke te hou tot die logistieke ketting weer aan die gang is.”
Volgens hom word tekorte aan voedsel en brandstof nie verwag nie.
Plundering moet dadelik stopgesit word
Die plundering van vragmotors en -houers het reeds kop uitgesteek in die gedeeltes van KwaZulu-Natal wat deur die vloede en swaar reën geraak is, sê mnr. Andrew Whitfield, DA-LP. Dit is volgens hom ontstellend aangesien dit herinner aan die geweld en plundering wat Julie verlede jaar in dié provinsie plaasgevind het.
Daarom versoek die DA dat mnr. Bheki Cele, minister van polisie, dadelik moet ingryp en verseker dat die polisie op ’n hoë gereedheidsvlak moet wees en enige voorvalle dadelik moet aanpak.
“Hierdie provinsie kan nie dieselfde katastrofiese gevolge as verlede jaar bekostig nie. Ons weet nou die regering en veral die polisie kon tot dusver nie hierdie onrus vinnig onderdruk nie.
“Onder geen omstandighede kan dieselfde weer gebeur nie. Bheki Cele moet onmiddellik verseker dat genoeg polisiebeamptes in die betrokke gebiede ontplooi word en dat enige teken van onwettige gedrag onmiddellik en beslissend aangepak word.”
