Die hoë internasionale melkprodusentepryse gaan na verwagting vanjaar effens daal, maar 'n ekonoom verwag nie dat dié daling Suid-Afrikaanse produsentepryse gaan raak nie.
Dr. Koos Coetzee, hoofekonoom van die Melkprodusente-organisasie (MPO), sê plaaslike produsentepryse is steeds laer as die gemiddelde internasionale prys van R4,98/liter wat vanjaar verwag word en aanstaande jaar se R4,70/liter. Die gemiddelde produsenteprys in Suid-Afrika is nou tussen R4,20 en R4,30.
Coetzee het die Suid-Afrikaanse suiwelbedryf vroeër vandeesmaand (Junie) by die 15de suiwelkonferensie van die internasionale netwerk vir plaasvergelykings (IFCN) in Italië verteenwoordig.
Hy sê suiwelwetenskaplikes van erkende groot suiwellande soos Amerika, Nieu-Seeland en Australië en ook van opkomende suiwellande soos Armenië en Malawi was optimisties oor die toekoms van die globale suiwelbedryf.
Altesame 45 suiwelwetenskapliks van ontwikkelde en ontwikkelende suiwelprodusentelande, wat meer as 90% van die wêreld se melkproduksie verteenwoordig, het lande se suiwelsektore en boerdery-ekonomieë ontleed.
Hieruit blyk dat boere laasjaar in die algemeen hoër pryse vir hul melk gekry het. Dit het tot hoër produksie in die eerste helfte van vanjaar gelei, wat weer tot effens laer suiwelprodukpryse gelei het.
Die globale melkaanbod gaan na verwagting vanjaar en aanstaande jaar met 2,6% groei terwyl die vraag daarvoor na verwagting vanjaar met 2,1% en aanstaande jaar met 2,8% sal groei.
