’n Ram se nageslag sal na verwagting meer as drie dekades nadat sy saad bewaar is, in September hulle opwagting in die Karoo maak. Die ram C103 was een van twee wat in 1986 deur mnre. Freddy Kock van Hanover en Tot Pienaar van Colesberg ingevoer is om die poenskop-eienskap in hulle kuddes te bevorder.
Mnr. Reinhardt Kock, Freddy se seun, sê toe hy die rekenings van die stoetery Preiss en Kock-Merino’s van die plaas Elandsfontein nagaan, besef hy dat 155 strooitjies van die ingevoerde ramme steeds deur Ramsem in Bloemfontein geberg word. Die saad is 31 jaar gelede getap, waarkynlik ’n jaar ná Ramsem se stigting.
Me. Ansie du Buisson van Ramsem sê dit is nie uitsonderlik dat saad van dié ouderdom sy lewenskragtigheid behou nie, mits dit korrek geberg word. Volgens Reinhardt het dr. Hendrik du Toit, ’n vennoot van Geneco, sowat 60 ooie met dié saad laparaskopies op 13 April behandel. Hulle sal in Junie vir dragtigheid geskandeer word en die eerste lammers sal na verwagting teen 13 September gebore word.
“Die ooie is uitgesoek om die ram se poenskopfaktor te benut. Hulle vagdikte wissel tussen 20 en 21 mikron. C103 het medium wol van 20,6 mikron gelewer,” sê hy.
