Me. Thabi Nkosi, voorsitter van die bank se direksie, het dit by die geleentheid buite Centurion as ’n belangrike mylpaal bestempel nadat die bank sedert April 2020 nie sy verpligtinge kon nakom nie.
Met die skema vir gemengde finansiering sal dit die eerste keer wees dat die bank weer geld aan nuwe kliënte leen, naamlik diegene wat aan die skema se kriteria voldoen.
Die skema se doel is om transformasie in die landbou te bevorder en opkomende klein en mediumgrootte boere te finansier.
Dit sal bestaan uit ’n gedeelte wat vanaf die departement sal kom, in die vorm van ’n nieterugbetaalbare staatstoekenning, en die bank sal dan dieselfde hoeveelheid geld aan die boer leen.
Me. Thoko Didiza, minister van landbou, grondhervorming en landelike ontwikkeling, het gesê die bekendstelling is eintlik ’n herbekendstelling, omdat ’n gidsprojek in 2018 bekend gestel is. Van die lesse wat daaruit geleer is, is dat die hefboomverhouding verlaag en terugbetaling verbeter moet word.
Die departement gebruik volgens haar deur die skema sy toekennings om beleggings deur die private sektor in die landbou te lok.
Nadat die pluimvee- en suikermeesterplan onderteken is, het die departement ’n landboufonds in 2021 saam met die Nywerheidsontwikkelingskorporasie begin om die transformasieteikens in dié planne te kan behaal, het Didiza gesê.
Volgens Nkosi is die Land Bank, wat nou heropgebou word, duidelik daaroor dat die ontwikkeling en transformasie van die landbou die kern van sy mandaat is. Die bank se sukses hiermee sal gemeet word aan die mate waartoe hy histories benadeelde mense in die hoofstroom van die landbouwaardeketting kan insluit.
Nkosi
het gesê ervaring toon daar is verskeie probleme vir
eerstegenerasie-landboubesighede en -boere om dié doelwit te bereik. Dit sluit
in gebrek aan toegang tot produktiewe landbougrond en water, gebrek aan toegang
tot geduldige en bekostigbare finansiering, wye onvermoë om sterk balansstate
as hefboom te kan gebruik vir ondernemingsgroei, en die onvermoë om die
ekwiteitsbydraes te lewer wat finansiers dikwels vereis om ondernemingsgroei te
ondersteun.
Risiko verminder
Sy het gesê die skema sal, danksy die gedeelte wat ’n staatstoekenning is, vir die bank die risiko verminder dat lenings nie terugbetaal word nie.
Die bank en die departement se doelwit is om oor die volgende drie jaar R1,95 miljard se finansiering aan klein en middelgrootte produsente te voorsien wat aan die hoofstroom-landbou-ekonomie en die landbouwaardeketting deelneem.
Die skema begin met ’n aanvanklike jaarlikse minimum van R325 miljoen se staatstoekennings, vir drie boekjare, vanaf die departement en die Land Bank sal dieselfde bedrag deur ’n lening voorsien. Dit begin in die huidige boekjaar.
Didiza het gesê die staatstoekenning help dat die finansiering meer bekostigbaar is vir boere, omdat die koste van lenings by handelsbanke “nie so gunstig” is nie.
Sy het ’n beroep gedoen op boere wat in aanmerking kom, om die leningsdeel terug te betaal en het dit verwelkom dat ’n deel van die skema ondersteuning behels nadat die finansiering goedgekeur is.
Ander finansiering
Nkosi het gesê hoewel die finansiering van boere deur die skema vir gemengde finansiering ’n belangrike deel is van die bank se nuwe strategie, bly die bank se kernsake en bevoegdhede die verskaffing van landboufinansieringsdienste op ’n wyse wat die bank sal in staat stel om kommersieel haalbaar te bly.
“Namate ons voortgaan om gespesialiseerde aanbiedings aan ons kommersiële kliënte te lewer, erken ons ook dat ons rol as ’n instelling vir ontwikkelingsfinansiering van ons vereis om die rol van ’n katalisator en fasiliteerder te vervul om ander elemente van die omvattende ondersteuningsprogram byeen te bring wat noodsaaklik is vir die volhoubaarheid van nuwe toetreders tot die sektor.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
