Die Land Bank het sedert 1 September 2009 (toe die bestuur bewus geword het van die foutiewe renteberekenings) tot einde verlede jaar altesame R56,575 miljoen ten gunste van boereklante teruggeskryf.
Mnr. Wolf Meyer, finansiële hoof van die bank, het aan Landbouweekblad gesê die bank het tot dusver navrae van 2 624 klante met gesamentlik 3 950 rekeninge ontvang. Hoewel alle navrae nog nie afgehandel is nie, is 3 553 van die foutiewe rekeninge reggestel.
Die meeste van dié rekeninge (2 758) is in die huidige boekjaar afgehandel. Die navrae het ook navrae oor renteberekening ingesluit.
Hoewel regstellings hoofsaaklik betrekking gehad het op die foutiewe verhaling van geld en die rente daarop, was die herberekening van rente ook gedoen op lenings van klante wat met die bank verskil het. “Klein aanpassings, indien enige, was nodig,” sê Meyer.
Hy gee egter toe dat sommige klante steeds nie saamstem met die bank se berekenings nie, maar sê dat dit weldra in die hof getoets sal word. Volgens Meyer het die probleem om ’n paar redes ontstaan.
Die bank het sy renteberekeningsmodel in 2000 vanaf enkelvoudig na saamgesteld verander.
Om egter te keer vir die effek van rente-op-rente, is die nominale koers verlaag. Die verandering het talle klante ongelukkig gemaak en dié dispuutpunt sal eersdaags in die hof getoets word.
Nog ’n rede vir die aanpassing van rekeninge is dat die Land Bank-wet in 2002 verander het.
Die verandering het vir die eerste keer voorsiening gemaak vir die betaling van administrasiegeld en boetes. Hoewel bestaande leningsooreenkomste nie voorsiening vir die betaling van sodanige geld vervat het nie, het die bank foutiewelik heffingsgeld op sulke lenings gevra.
Dié fout word tans reggestel.
Lees meer in Landbouweekblad se uitgawe van 28 Januarie 2011.
25 Januarie 2011
