Die nuwe lede van die direksie van die Land Bank sluit drie landbou-ekonome met wye ervaring in, insluitend die voorsitter en ondervoorsitter.
Me. Thabi Nkosi is die nuwe nie-uitvoerende voorsitter en mnr. Andrew Makenete die nie-uitvoerende ondervoorsitter. Nog ’n bekende in landboukringe in die nuwe direksie is prof. Johann Kirsten, ook ’n landbou-ekonoom.
Die nuwe direksie, wat net een heraanstelling behels, is aangewys nadat die vorige direksie van die beleërde bank se termyn op 30 November verstryk het.
Die ander nie-uitvoerende lede van die direksie is me. Mathane Makgatho (heraanstelling), me. Dineo Maithufi, me. Thulisile Njapa Mashanda, me. Nonthuthuzelo Pinkie Motshegoa, me. Egashnee Pillay, dr. Monde Mbovu Tom, en mnr. Dimitri Wilhelm van der Westhuizen. Me. Khensani Mukhari, die bank se finansiële hoof, is ’n uitvoerende lid.
Die aanstellingsproses van die direksie behels dat mnr. Enoch Godongwana, minister van finansies, aanbevelings na die kabinet maak. Die nasionale tesourie het verlede week ná die kabinetsgoedkeuring in ’n verklaring gesê Nkosi (36) is ’n gerespekteerde landbou-ekonoom, met uiteenlopende en uitgebreide ervaring in landboubesigheid, die opstel van landboubeleid en landboubesigheidsbedrywighede.
Sy het al verskeie posisies beklee, beide in die private en die openbare sektor en dien tans as onafhanklike nie-uitvoerende trustee by die Nasionale Bemagtigingsfonds, as voorsitter van die Mintirho-stigting (Coca-Cola Bottlers SA se landboubeleggingsfonds), en as ’n adviserende direkteur vir die landboutegnologiemaatskappy Khula!.
“As nie-uitvoerende voorsitter van die direksie van Land Bank sal me. Nkosi die herlewing van die land se grootste landbougefokusde uitlener lei,” luidens die verklaring. Haar kwalifikasies sluit in ’n MBA, ’n nagraadse diploma in sake-administrasie en bestuur, en die grade MSc (kursuswerk voltooi) en BScAgric in landbou-ekonomie.
