Mnr. Ayanda Kanana, wat die afgelope twee jaar die uitvoerende hoof van die beleërde Land Bank is, het bedank.
Kanana, voormalige uitvoerende hoof van die Johannesburgse varsproduktemark, het op 1 Maart 2020 by die bank begin werk en dit het in April 2020 bekend geword dat die bank nie sy betalerverpligtinge kon nakom nie.
Voordat Kanana aangestel is, was die bank langer as ’n jaar sonder ’n heeltydse hoof. Mnr. TP Nchocho, vorige uitvoerende hoof, het laat in 2018 bedank waarna mnr. Bennie van Rooy, destyds finansiële hoof, van Desember 2018 tot middel 2019 as uitvoerende hoof waargeneem het. Hierna het me. Kone Gugushe, waarnemende finansiële hoof, as uitvoerende hoof waargeneem.
Die bank het gister in ’n verklaring gesê Kanana se kennistydperk duur tot einde April.
“Hy het in ’n baie moeilike tyd by die Land Bank aangesluit en die entiteit se omkeerpogings gelei. Onder sy leierskap het die bank beduidende vordering in noodsaaklike gebiede van die stabiliseringsproses gemaak, met die samewerking van die bank se finansiers en met die ondersteuning van die nasionale tesourie.”
Nog ’n senior bedanking
Die instelling het ook bekend gemaak dat dr. Litha Magingxa, uitvoerende bestuurder van landbou-ekonomie en advies en waarnemende uitvoerende bestuurder van strategie en kommunikasie, bedank het.
Magingxa het vier jaar by die bank gewerk en volgens die instelling die doeltreffendheid van die adviesdienste baie verbeter. Hy het die bank se strategiedivisie tydens die huidige stel veranderinge gelei.
Toegewy om momentum te behou
Me. Thabi Nkosi, voorsitter van die Land Bank-direksie, het Kanana en Magingxa namens die direksie vir hul bydraes bedank. “Die direksie werk met bekwame spoed om die Land Bank se finansiële probleme op te los en is opgewonde oor die toekoms van die bank terwyl die instelling die finale ronde na volle hervatting van bedrywighede navigeer.”
Die direksie sê hy bly daartoe toegewy om voort te bou op die momentum van die inwerkingstelling van ’n oplossing vir die bank se huidige wanbetalingstatus en hy gee voorkeur daaraan om homself volgens sy kernontwikkelingsmandaat te herskik.
Die direksie is in gesprek met mnr. Enoch Godongwana, minister van finansies, om deurlopende leierskap by die bank te verseker.
