Die dag word aangebied in ’n gebied wat Suid-Afrika se hoogste gemiddelde mielie-opbrengste oor tyd lewer en De Klerk was deel van ’n paneel wat die plaaslike landboubedryf onder die loep geneem het.
“Van die suksesvolste produsente in Suid-Afrika is van dié gebied, en die dag word aangebied deur een van die sterkste boereverenigings in die land. Dit is ’n goeie platform om van te werk, en moeilike tye bring leiers na vore,” het De Klerk gesê.
Hy het gesê daar kan op verskillende maniere oor die vraagstuk van die paneelbespreking gedink word, insluitende strategiese, praktiese, filosofiese en self humoristiese maniere. “Uit ’n strategiese perspektief, as jy na iemand soos dr. PG Strauss, groep- besturende direkteur van die VKB Groep luister, sal jy hoor hy sê jy moet waarde toevoeg in tye van groot onsekerheid. Elke bietjie waarde wat toegevoeg word, skep meer sekerheid. Doen wat jy moet doen en konsentreer op jou kernbesigheid. Konsentreer op jou primêre funksie en doen dit bitter goed. Dit skep reeds onmeetbare waarde soos salarisse wat betaal word, met verdere ekonomiese voordele wat uitkring. As jy dan nog bandwydte het, voeg verdere waarde in die gemeenskappe rondom jou toe.”
Hy het gesê mnr. Llewellyn Brooks, groep- besturende direkteur van die GWK Groep, sê dat ’n strategiese klem op kernbesigheid, tesame met die regte vennootskappe, ’n besigheid in staat stel om suksesvol deur moeilike tye bestuur te word.
“Saamgestelde waarde word geskep as jy konsentreer op dit waarmee jy goed is, en jou vennote konsentreer op dit waarmee hulle goed is.”
Maak wêreld beter plek
Hy het gesê van ’n filosofiese perspektief, waar die vermoë bestaan, moet gekonsentreer word daarop om die wêreld ’n beter plek te maak. “Ons moet soveel moontlik orde in enige chaos rondom ons skep. Ons moet mense aktief ophef sonder om iets terug te verwag en saam met ons gemeenskappe werk om die wêreld rondom ons te verbeter. Dit neutraliseer die teenpole van politiek, verseker die regte persepsies, bring mense bymekaar en verseker ’n gemeenskaplike belang en ‘n klem op dit wat regtig saakmaak vir ’n volhoubare toekoms, spesifiek ook op die platteland.”
Van ’n praktiese perspektief op die plaas is die klem uiteraard daarop om so doeltreffend en presies as moontlik te bewerk, om so goedkoop as moontlik te plant en te oes en om die beste prys te beding. Om dit reg te kry, moet saam met die regte vennote gewerk word wat die beste waarde beding, die regte eienaarskapsmodelle vir produsente het én die produsent in staat stel om in die sukses van sy vennote te deel.
De Klerk het gesê dit is ook goed om te sien mense in die landbou verloor nie hul humorsin nie, maak nie saak hoe moeilik dit soms gaan nie. “In die Noord-Kaap waar die riviere nou hul oewers oorstroom, is daar steeds produsente wat op video’s voorgee dat hulle hul beproeiingspompe aan vergeet het waar landerye heeltemal oorstroom is. En op die boeredag soos by Broodsnyers sal daar altyd iemand wees wat teen gaste soos die Springbokslot Bakkies Botha wil skrum. Dit is maar hoe ons mense is. En dit laat ons lekker saam lag nieteenstaande enige omstandighede nie.”
Hierdie humorsin is kosbaar, veral in moeilike tye, het hy gesê en bygevoeg dat mense in die landbou altyd moet onthou dat hulle belangrike werk doen wat ’n verskil maak en waardeer word. “Die landboubedryf is iets kosbaars in Suid-Afrika wat tot elke prys beskerm moet word. En ons moet nooit vergeet ons genade kom van Bo, en hoe geseënd ons is nie.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
