Mnr. Frans Kapofi, die Namibiese minister van presidensiële aangeleenthede, het op uitnodiging van die voorsitter van die Namibiese Landbou-unie, mnr. Ryno van der Merwe, dié organisasie se jaarlikse strategiese beplanningsessie bygewoon.
Kapofi het tydens die byeenkoms die belangrikheid van die bydrae van die kommersiële landbou tot Namibië se ekonomie benadruk en die land se regering se waardering vir boere uitgespreek. Wat grondhervorming aangaan het hy sy kommer uitgespreek oor sommige hervestigingsplase wat nie produktief is nie.
Hy het kommersiële boere aangemoedig om te help waar dit nodig is om Namibië se landbousektor verder te kommersialiseer en het na sy eie ondervinding verwys, waar kommersiële boere hom gehelp het om sy eie plaas uit te brei. Hy het ook klem geplaas daarop dat die skepping van welvaart eerder aandag moet geniet as die herverdeling daarvan, en meen dat dít die verantwoordelikheid van almal in Namibië is.
