Boere se bekommernisse oor die uitwerking van klimaatsverandering sal ook op die agenda wees wanneer Cop 17 eersdaags in Durban plaasvind.
Cop 17 vind van 28 November tot 9 Desember plaas en is internasionaal in die kollig as ’n baie belangrike geleentheid met ’n groot uitwerking op die rigting wat wêreldlande inslaan as dit by die bestuur van klimaatsverandering kom.
Die Suider-Afrikaanse Konfederasie van Landbou-unies (Sacau) gaan dié klimaatsberaad bywoon en die landbou se rol op die vasteland van Afrika deur middel van ’n 15-puntverklaring duidelik maak asook die uitdagings wat klimaatsverandering aan boere en die bedryf stel. Die verklaring is onder dié berig beskikbaar.
“Die landbou is die ekonomiese slagaar van die meeste Afrika-lande en lewer ’n noemenswaardige bydrae tot voedselsekerheid en die verligting van armoede vir miljoene huishoudings op die vasteland,” sê mnr. Ishmael Sunga, hoof uitvoerende beampte van Sacau.
“Klimaatsverandering sal ons vermoë om onsself te voed, beïnvloed en sal die gebiede tref waar ons die weerbaarste is.”
Verandering aan UNFCC
Sacau beywer hom onder meer vir die verandering van die oorspronklik goedgekeurde teks van die VN-konvensie oor klimaatsverandering (UNFCCC). Die afwesigheid van die landbou in dié beleid word as ’n groot leemte gesien.
Die organisasie is ook ten gunste van ’n bindende ooreenkoms by Cop 17 en dring daarop aan dat alle lande onderneem om aan dié ooreenkoms se voorwaardes te voldoen.
“Ons vra die globale gemeenskap om die hulpbronne te verskaf ter ondersteuning van Afrika se inisiatiewe in die geveg teen klimaatsverandering,” sê Sunga.
17 November 2011
