As werkskepping in die landbou met dié in die motorbedryf vergelyk word, behoort dit ekonomiese sowel as politieke sin vir die Regering te maak om die landbou baie sterker te steun, sê mnr. Mike Schüssler, bekende ekonoom.
Landbou verdien meer Regeringsteun as motorvervaardigers
Hy het op die TLU SA se kongres in Pretoria gesê motorvervaardigers ontvang jaarliks R17 miljard se subsidies en steun van die Regering, teenoor R1 miljard vir die landbou. Daarteenoor word daar in die motorbedryf net 34 000 regstreekse werkgeleenthede geskep teenoor die landbou se 650 000. “Feite soos dié moet baie sterker deur die landbou verkondig word. Boere wat werk kan skep, is ’n skaars en kosbare bate met ’n groot ekonomiese waarde vir die land.”
Schüssler sê daar is 1,9 miljoen mense in Suid-Afrika met hul eie ondernemings wat werk aan 33 miljoen volwassenes verskaf. Die meeste van die ondernemings is egter eenmansake. Net 700 000 van die ondernemings neem ander mense ook in diens en ’n skamele 270 000 (0,9%) het meer as vyf werkers. Sowat 11 000 daarvan is boerderye wat elk aan meer as vyf mense werk verskaf. Hy sê as in ag geneem word dat dit gemiddeld 10 tot 12 jaar duur voor ’n onderneming sterk genoeg is om ander mense in diens te kan neem, wys dit hoe belangrik sulke ondernemings is. “As politieke leiers van die landbou se belangrikheid oortuig kan word, kan dit goed gaan met dié sektor.
Ondersteuning nie net oor geld nie
Ondersteuning aan die landbou gaan nie net oor geld nie, dit gaan ook oor goed soos beleid, nuwe markte en goeie voorligtingsdienste.” Sy vooruitsigte vir die bedryf is dat dit nie heeltemal duister is nie. “Groei sal egter onder-normaal wees en daar wag talle probleme.” In die algemene ekonomie in Suid-Afrika sal groei ook traag bly – onder 3% in die volgende twee jaar. Sy verwagting is dat inflasie vanaf 5,6% vanjaar tot 6,5% volgende jaar sal styg, hoofsaaklik weens ’n styging in voedselpryse. Voedselpryse sal vir die volgende 18 maande hoog bly voor dit weer behoort te daal. Twee groot probleme in Suid- Afrika is dat die onderwys swakker is as die meeste ander Afrikalande s’n en dat kinders sonder twee ouers moet grootword.
